ពេលនេះដឹងមូលហេតុពិតដែលនាយ ចឺម ចាកចេញពីក្រុមកំប្លែងនាយ ពែក មី ហើយគឺដោយសារ..

ខណៈពេលកេរ្តិ៍ឈ្មោះបោះសំឡេងទាំងផ្នែកចម្រៀង កំប្លែង និងសម្ដែង នាយ ចឺម បែរជាប្រកាសដើរចេញពីក្រុមកំប្លែង ពែកមី មួយរយៈទៅវិញ បន្ទាប់ពីខកខានសម្តែងក្នុងក្រុមប្រមាណជាង១ខែមកនេះ។

ចំពោះការដើរចេញនេះដែរ នាយ ចឺម បានប្រាប់ Sabay ថា ខ្លួនមិនបានទៅចូលក្រុមកំប្លែងណាមួយនោះនោះទេ។ នាយថា ការផ្អាកកំប្លែងមួយរយៈដោយសារតែចង់ពង្រឹង និងផ្ដោតសំខាន់ទៅលើវិស័យចម្រៀងនៅផលិតកម្មសាន់ដេ តែមួយមុខប៉ុណ្ណោះ ដើម្បីមានពេលវេលារិះរកបទចម្រៀង និងក្បាច់រាំថ្មីៗ ហើយប្លែកជូនដល់ពុកម៉ែបងប្អូនដែលគាំទ្រខ្លួននាពេលកន្លងមក។

មួយវិញទៀត នាយចង់បញ្ជាក់ប្រាប់ទៅមហាជនថា ការផ្អាកពីអាជីពជាអ្នកកំប្លែងមួយរយៈនេះ មិនបានន័យថាភ្លេចកំណើតខ្លួននៅក្នុងក្រុម ពែកមី ឬទូរទស្សន៍ CTN នោះទេ ហើយការឈប់នេះក៏មិនឈប់រហូតដែរ ថ្ងៃណាមួយពេលវេលាអំណោយផល នឹងចូលកំប្លែងវិញជាក់ជាពុំខាន។

“ បាទមានអ្នកខ្លះគាត់និយាយថាខ្ញុំបានល្បីភ្លេចកំណើតខ្លួនឯង តែខ្ញុំមិនដែលភ្លេចទេបង កន្លែងណាដែលផ្ដល់កំណើតឲ្យខ្ញុំ រូបខ្ញុំចងចាំជានិច្ច ហើយថ្ងៃណាមួយខ្ញុំនឹងចូលវិញ គ្រាន់តែថាពេលនេះចង់ពង្រឹងបទចម្រៀងខ្ញុំនៅសាន់ដេសិន"។ នាយ ចឺម រៀបរាប់៕