សាហាវណាស់ ! ក្មេងស្ទាវមួយក្រុមខឹងស្រលាញ់កូនក្រមុំគេមិនបាន នៅយប់ក្រេបទឹកឃ្មុំ ក៍ចាប់កូនកំលោះចាក់ធ្លាយពោះវៀនចេញមកក្រៅ
ខេត្តឧត្តរមានជ័យ ៖ ជារឿងដ៏គួរឱ្យតក់ស្លុតនិងរន្ធត់សម្រាប់ក្រុមគ្រួសារ១ ពិសេសភរិយាថ្មោងថ្មី ដែលសូម្បីតែក្លិន និងរាត្រីទី១ដ៏ផ្អែមត្រជាក់ក៏រសាត់បាត់តែមួយប៉ប្រិចភ្នែកខណៈកូនកំលោះបានក្លាយទៅជាជនរងគ្រោះ ខកខានក្រេបច័ន្ទទឹកឃ្មុំ ។
ជីវិតអភ័ព្វនេះដោយសារស្នាដៃជនដៃដល់ ជាជនពាលដែលបង្កជម្លោះក្នុងវង់រាំធុងបាស់នៃមង្គលការមួយនេះបានចាក់កូនកំលោះមួយកាំបិតចំក្រលៀនបណ្តាលឱ្យរងរបួសធ្ងន់ធ្ងរ ត្រូវបាននាំទៅសង្គ្រោះនៅមន្ទីរពេទ្យ ។ ហេតុការណ៍អកុសលនេះបានកើតមានឡើង នៅវេលាម៉ោង១០យប់ ថ្ងៃទី២៩ខែវិច្ឆកា នៅភូមិទួលក្រឡាញ់ ឃុំថ្លាត ស្រុកអន្លង់វែង ក្នុងថ្ងៃអាពាហ៍ពិពាហ៍កូនប្រុសស្រី១គូ ។ កូនកំលោះអភ័ព្វមានឈ្មោះឱម សាវេត អាយុ២២ឆ្នាំ ជាគូនឹងកូនក្រមុំឈ្មោះអេង ស្រីរត្ន អាយុ១៨ឆ្នាំ។
រឿងរា៉វដែលបានកើតឡើងគឺនៅក្នុងកម្មវិធីចាក់ធុងបាស់រាំលេងកម្សាន្តនាពេលរាត្រី ដែលមានការរាំច្រៀង ដើម្បីផ្តល់នូវការសប្បាយរីករាយសម្រាប់ក្រុមគ្រួសារនិងភ្ញៀវជិតឆ្ងាយ ដែលបានចូលរួម ។ ផ្ទុយទៅវិញមានយុវជនទំនើង២ក្រុមបែរជាកើតមានជម្លោះវាយតប់គ្នាក្នុងវង់រាំទៅវិញ ។ ឃើញសភាពច្របូកច្របល់បែបនេះកូនកំលោះបានចូលទៅឃាត់ ដូចទៅឱ្យជនដៃដល់ម្នាក់ចាក់១កាំបិតចុងស្រួចចំគ្រលៀនខាងឆ្វេងបណ្តាលឱ្យរងរបួសធ្ងន់នាំទៅមន្ទីរពេទ្យទាំងយប់ ។ តាមសាក្សីបានឱ្យដឹងថា ហេតុការណ៍ដ៏អាក្រក់បានកើតឡើងដោយសារក្មេងទំនើងចំនួន២ក្រុម បានកើតមានជម្លោះនឹងគ្នា ពេលនោះកូនកំលោះបានរត់ទៅឃាត់ជនដៃដល់ឱ្យបញ្ឈប់ការប្រទូស្តរាយគ្នា ស្រាប់តែជនដៃដល់បានចាក់១កាំបិត បណ្តាលឱ្យរបួសដេកដួលទៅលើធរណីនឹងមានឈាមហូរក្រហមច្រាល ។ ការចាក់កូនកម្លោះឱ្យរងរបួសនោះបានធ្វើឱ្យការរាំកម្សាន្តត្រូវបានបញ្ឈប់ភ្លាមៗនោះដែរ ហើយគ្រប់គ្នាក៏បាននាំកូនកំលោះទៅធ្វើការសង្គ្រោះនៅមន្ទីរពេទ្យខេត្ត ។ ចំណែកជនដៃដល់នឹងបក្សពួកចំនួន៣នាក់ត្រូវបានប៉ូលិសរដ្ឋបាលឃុំថ្លាត ឃាត់ខ្លួនភ្លាមៗដែរនៅនឹងកន្លែងកើតហេតុ ។ ក្រុមជនដៃដល់ ១-ឈ្មោះហ៊ឹម សុខន ភេទប្រុស អាយុ២៣ឆ្នាំ មានស្រុកកំណើតខេត្តក្រចេះ បច្ចុប្បន្នមកស្នាក់នៅក្នុងស្រុកអន្លង់វែង គឺជាជនដៃដល់ ។ ២-ឈ្មោះភាន់ រិន ភេទប្រុស អាយុ១៧ឆ្នាំ និង៣-ឈ្មោះមាន សល ភេទប្រុស អាយុ២៣ឆ្នាំ ទាំងពីរនាក់ជាបក្សពួករស់នៅក្នុងភូមិលំទង ឃុំលំទង ស្រុកអន្លង់វែង ។
ចំពោះការឃាត់ខ្លួនក្រុមជនដៃដល់នេះគេមិនទាន់ដឹងថា លោកអធិការនគរបាលស្រុកអន្លង់វែង នឹងចាត់ការបែបណានៅឡើយទេ ។ ទាក់ទិននឹងហេតុការណ៍នេះ កាលពីរសៀលថ្ងៃទី២៥ មីនា កោះសន្តិភាពបានទូរស័ព្ទសុំការបំភ្លឺពីលោកវរសេនីយ៍ត្រី ស៊ុយ សេង អធិការស្រុកអន្លង់វែងដែរ ប៉ុន្តែពុំមានអ្នកលើកទទួល ៕
No comments