(សូមអាន)តើគួរលាងសម្អាតរថយន្ត ប៉ុន្មានដងក្នុងមួយខែ ទើបជារឿងត្រឹមត្រូវ?

ការលាងសម្អាតរថយន្តជាប្រចាំ អាចជួយថែទាំរថយន្តឲ្យនៅថ្មីស្អាតជានិច្ច។ គេអាចទៅរកសេវាលាងរថយន្តតាមទីតាំងនានា ឬមួយឆ្លៀតពេលទំនេរលាងដោយខ្លួនឯងនៅផ្ទះក៏បាន។ តើគួរលាងរថយន្តប៉ុន្មានដងក្នុងមួយខែ ទើបជារឿងត្រឹមត្រូវ?

តាមអ្នកជំនាញបានលើកឡើងថា គេគួរលាងសំអាតរថយន្តឲ្យបាន ១ ដងក្នុងមួយសប្ដាហ៍ បើប្រើប្រាស់ក្នុងលក្ខខណ្ឌ៖ បើកបរក្នុងតំបន់ឧស្សាហកម្មនិងសំណង់មមាញឹក តំបន់មាត់សមុទ្រ (សារធាតុអំបិលក្នុងខ្យល់អាចបង្កឲ្យបង្គំគ្រឿងក្នុងឆាប់ច្រេះ) តំបន់មានដីហុយច្រើន ទម្លាប់ចតរថយន្តនៅខាងក្រៅជាប្រចាំ (ក្រោមដើមឈើមានស្លឹកឈើជ្រុះនិងមានសត្វបក្សី) អាកាសធាតុមិនអំណោយផល ដូចជាកម្ដៅកើនឡើងខ្ពស់, ធ្លាក់ព្រិល និងភ្លៀងខ្លាំង។ បើរថយន្តទុកចោលក្នុងផ្ទះ មិនសូវជិះធ្វើដំណើរទៅណាមកណា ឬយូរៗជិះទៅណាម្ដង យ៉ាងហោចណាស់ក៏គួរលាងសម្អាត ១ ដងក្នុងមួយខែ។ +ហេតុអ្វីចាំបាច់ត្រូវលាងសម្អាតរថយន្តជាប្រចាំ? លោក រតនៈ ម្ចាស់មជ្ឈមណ្ឌលថែទាំរថយន្តរតនៈ ធ្លាប់ប្រាប់ Sabay ថា រថយន្តដែលជិះច្រើនឆ្នាំ ជាពិសេសរថយន្តដែលបើកបរលើផ្លូវដែលមានដីហុយ នាំឲ្យមានធូលីតោងជាប់មកជាមួយ ឬដីដែលជាប់ជាមួយស្បែកជើង។ តាមបទពិសោធរបស់លោក រថយន្តខ្លះមានដក់ទឹកនៅបាតផ្នែកខាងក្នុង ដូចនេះវានាំទៅរកការពុកច្រេះបាតឡានជាដើម។ ដូច្នេះ បើមិនធ្លាប់សម្អាត មិនបានដឹងថា វាកខ្វក់ត្រង់ណា លុះត្រាតែសម្អាតទើបច្បាស់។

ម្ចាស់ទីតាំងបើកសេវាលាងរថយន្តនេះបន្តទៀតថា ការលាងសម្អាតក៏ដើម្បីសុខភាពអ្នកជិះនិងអ្នករួមដំណើរ។ "ដូចដឹងហើយ បើអ្នកបើកកញ្ចក់ ធូលីដីនឹងប៉ើងចូលក្នុងរថយន្តដោយចៀសមិនផុត។ ឯក្នុងរថយន្តរបស់អ្នក គឺបិទជិត ពេលអ្នកបើកម៉ាស៊ីនត្រជាក់ ភាពកខ្វក់នោះនឹងប៉ះពាល់។ ករណីខ្លះទៀតបណ្តាលឲ្យមានក្លិនមិនល្អក្នុងរថយន្ត មិនមានអារម្មណ៍សុខស្រូល ពេលជិះធ្វើដំណើរ"។ លោកថា ការលាងសម្អាតរថយន្ត ធ្វើឲ្យរថយន្តមើលទៅនៅថ្មីចាំឆ្នាំ នៅពេលចង់លក់ចេញទៅវិញ គេប្រាកដជាមើលរូបរាងខាងក្រៅជាចម្បង ព្រោះបើកាលណាតួខ្លួនស្អាត, ទឹកថ្នាំនៅភ្លឺល្អ នោះគេក៏ហ៊ានឲ្យតម្លៃខ្ពស់វិញដែរ ស្របពេលគេហ៊ានសន្មតបានថាអ្នកជាមនុស្សដែលស្រលាញ់ចេះថែទាំរថយន្តបានល្អ។ បើតាមម្ចាស់ទីតាំងលាងរថយន្តរូបនេះបញ្ជាក់ថា តាមបច្ចេកទេសការលាងសម្អាតមិនមែនគ្រាន់តែយកទឹកសាប៊ូមកលាងសើរៗទេ គឺបក និងដោះលាងដល់បាតខាងក្រោមតែម្តង ដោយសម្អាតជាច្រើនសារ ដាក់ហាលក្រោមកម្តៅថ្ងៃ ផ្លុំខ្យល់សម្ងួតរហូតដល់ស្ងួតល្អ ទើបរៀបបញ្ចូលវិញ។ ក្រោយការសម្អាត អ្នកបើកបរនឹងមានអារម្មណ៍ថា មានផាសុខភាពជាងមុន៕